KALIBO, Aklan—Sa padayun nga pagpahaum sa mga kalamidad, nagpatigayon ro Provincial Disaster Risk Reduction and Management Office ukon PDRRMO-Aklan it sangka Earthquake Drill sa provincial capitol building.
Raya hay bilang pagbuylog sa 4th Quarter 2023 Nationwide Simultaneous Earthquake Drill.
Suno kay Jeffrey Jismundo it PDRRMO-Aklan nga sangka alarm button ro ginpindot bilang senyales it pag-umpisa it nasambit nga drill.
Matapos mabatian ro sirena hay naggueuwa ro mga empleyado it provincial capitol ag nagpatigayon it “Duck, Cover, and Hold position” ag insigidang nag agto sa sangka open area sa basketball court sa Goding Ramos park sa prente it kapitolyo.
Pagkatapos kara hay nagpatigayon it headcount sa kada empleyado ag kon may kueang hay dayun nga paga-usuyon it mga responders.
Nasayuran nga nauna eon nga nagpaguwa it memorandum si Aklan governor Joen Miraflores nga nagamandu sa tanan nga mga department heads ag taeatapan nga magpasakop sa drill.
Suno kay Jismundo nga tuyo kara nga mataw-an it kahauman ro mga empleyado, mga estudyante ag manugturo kamana man ro mga residente kon ano ro tama nga obrahon kon may linog ag iba pang kalamidad.
