KALIBO, Aklan—Sa atubang it waea-tuo nga mga aktibidad makaron nga Semana Santa ag summer vacation, igapaidaeum sa red alert status ro Provincial Disaster Risk Reduction and Management Office ukon PDRRMO-Aklan umpisa sa abril 12 hasta 20 agud nga masiguro ro kahauman sa mga emerhensiya ag epektibong pag-asikaso sa mga deboto ag biyahero.
Raya ro ginpahayag ni Manuel Jayfree Jismundo it PDRRMO-Aklan kasunod it ginpaguwa nga memorandum circular nga pirmado ni Governor Joen Miraflores.
Tuyo it nasambit nga tikang nga masiguro ro kaeowasan it mga residente ag turista sa tiyempo it Semana Santa.
Magiging kabulig sigon nanda sa pagbantay 24 oras ro tanan nga MDRRMO sa bilog nga probinsiya.
Sa maabot nga Abril 17 hasta 18 hay magadeploy sigon sanda it mga roving ag stationed nga medical ag emergency team sa mga lugar nga ginaeauman nga pagadagsaon it tawo, kaibahan ro mga baybayon, national highway, pilgrimage sites ag simbahan .
Kaibahan sa andang pagatutukan ro Manduyog Hill sa banwa it Banga ag ro mga karsadahon nga paga-agyan it religious procession .
Ginpasiguro kara nga haum sanda kaibahan ro andang mga medical team nga magtau it serbisyo sa maka-encounter it problema sa ikamayad nga eawas , vehicular accidents ag iba pang mga emergency cases.
Mag-eowas kara, haum eon man ro andang mga gamit kapareho it emergency vehicles, first aid supplies ag iba pa.
Ginpasiguro man ni Jismundo nga padayun sanda nga naka alerto sa abril 19 hasta 20 bangud sa ginaeauman nga influx it mga magpamilya nga maga-excursion sa mga baybayon ag mga resorts nga may mga swimming pool halin sa Batan hasta sa Buruanga eakip ro Isla it Boracay.
