KALIBO, Aklan–Nakalista ro Provincial Disaster Risk Reduction and Management Office (PDRRMO)-Aklan it kapin sa 18,594 nga apektadong pamilya ukon katumbas it 65,168 nga evacuees bangud sa pagpanaeasa it bagyong Paeng.
Suno kay PDRRMO-Aklan Head Galo Ibardolasa nga raya hay kasunod it andang ginpatigayun nga pre-emptive evacuation kung siin nagpadaea sanda it mga dump truck sa banwa it Kalibo ag Numancia.
Pila sigon sa mga biktima hay presenteng nagapabilin sa ABL sports complex.
Base sa pinakaulihing initial damage assessment report it taeatapan kahapon, nakalista sanda it ap-at katawo nga patay halin sa Libacao, sambilog nga ninahan ag daywang missing.
Naga-abot man sa 22 ka mga panimaeay ro partially damage nga ginakaeakipan it 13 sa Madalag, pito sa Numancia ag tig sambilog sa Libacao ag Nabas.
Samtang, ro totally damage nga panimaeay hay 12 kung siin pito ro nailista sa Libacao ag lima sa Madalag.
May kaangtanan kara, sumaka eon sa P39,885,213 ro nailistang kahalitan sa agrikultura halin sa 12 kabanwahanan.
Kapin sa P63,174,000 man ro naging kahalitan sa imprastraktura.
Sa makaron, passable eon sigon ro mga karsada sa haeos bilog nga Aklan.
Mag-euwas kara, may nailista man nga pilang turista ag residente nga stranded sa patalan partikular ro nagapatabok sa isla it Boracay tuga it pagpanaeasa it bagyong Paeng. Ginlaygayan man kara ro mga pumueoyo nga maging alerto ag insigidang magbakwit engkaso nga maka-eksperyensya it pagtaas it tubi sa andang natungdan nga lugar.
