KALIBO, Aklan—Uwa it nailista ro Aklan Provincial Disaster Risk Reduction Management Office ukon PDRRMO nga major incident sa kasagsagan it ginpatigayon nga National and Local Election 2025 ko adlaw it Lunes, Mayo 12, 2025.
Raya hay suno kay Gary Vilmer Taytayon, chief operations it PDRRMO Aklan angot sa andang pangkabilugang assessment maghalin sa mga reports sa tagsa ka Municipal Disaster Risk Reduction Management Office ukon MDRRMO’s sa mga natungdan nga banwa.
Ginpaabot man nana ro pagpasaeamat sa tanan nga pumueoyo sa andang kooperasyon kon sa siin nag-adto ro mga raya it temprano sa voting centers agud nga malikawan ro singkae it init.
Sa pihak kara, inde malikawan ro pila ka mga manageable incidents apang sa kabilugan hay nailista ro zero major incident nga eubus nandang ginkalipay bangud sa raya ro andang tinutuyo sa andang preparasyon nga ginpatigayon kapin eon ro pagtao it impormasyon sa mga botante nga magpadueong it temprano sa polling precints agud nga inde maabutan it pagdueotdutan ag grabeng kainit it panyempo.
