KALIBO, Aklan–Nakalista it mga pagguho it eugta sa pilang kabanwahanan it probinsya it Aklan ro Provincial Disaster Risk Reduction Management Office (PDRRMO) ko adlaw it Lunes matapos ro pagbuhos it mabaskog nga uean nga daea it bagyong Quinta.
Partikular nga gintumod ni Mr. Galo Ibardolasa it PDRRMO-Aklan ro nag-eontad nga landslide sa daeanon nga sakop it Brgy. Kabulihan, Buruanga, Brgy. Sibalew, Banga ag ro provincial road sa bahin it Brgy. Sipac, Malinao.
Samtang, naka-monitor man sigon sanda it mga pagbaha sa pilang parte it probinsya tuga it tropical cyclone warning signal No. 1 bangud sa pagpanaeasa it bagyong Quinta.
Sa mayad nga swerte hay owa it nailistang casualties ukon mga missing maeuwas sa ginpatigayun nga rescue operation it MDRRMO-Banga sa sangka pamilya nga na-trap sa maisot nga isla nga sakop it Brgy. Cerrudo, Banga.
Nagpadumdom man raya sa publiko nga perming maging haum sa tanan nga kalamidad ag magbakwit it mas temprano kung prone sa baha ro andang lugar.
