Nakamonitor makaron 24/7 ro Provincial Disaster Risk Reduction Management Office ukon PDRRMO kaibahan ro iba pang natungdan nga ahensya it gobyerno sa mga kaeawran nga sakop it probinsya it Aklan.
Raya hay kasunod sa maeapnagong halit nga daea it oil spill maghalin sa nag-eogdang nga barkong MT Princess Empress sa Naujan, Oriental Mindoro.
Suno kay PDRRMO Aklan head Mr. Galo Ibardolasa, gin-abisuhan eon nana ro mga MDRRMO’s it mga coastal town maghalin sa banwa it Buruanga hasta sa munisipalidad it Batan nga hugton ro monitoring sa mga nasambit nga kaeawran sa andang lugar.
Tuyo kara nga makahimo it tikang agud nga inde eon magkalhit ro oil spill engkaso gidman nga makaabot sa sea waters it Aklan.
Sa makaron suno kay Ibardolasa hay ro Caluya, Antique ro eubus nga naapektuhan bangud sa direksyon it Hanging Amihan.
Apang, uwa gihapon nanda ginaduea ro posibilidad nga base makaabot sa kaeawran it probinsya ro langis maskin nga sangkiri eamang ro nakikitang tyansa nga makaabot pa raya sa Aklan.
Naka-preposisyon eon suno kana ro oil spill boom it Philippine Coast Guard ag hugot sanda nga nakabantay sa sitwasyon makaron sa kaeawran.
