Nagapameligro nga madelay ro nakataeanang peace talks sa Iran matapos i-insister kara nga dapat anay nga masabat ro andang mga kondisyon antes nga umpisahan ro negosasyon kaibahan ro Estados Unidos.
Suno kay Iranian Parliament Speaker Mohammad Baqer Qalibaf, kinahangean nga ma-unblock anay ro mga nakatenggang Iranian assets ag makaangkon it eubus nga ceasefire sa Lebanon bago umpisahan ro negosasyon.
Nakasugtanan eon sigon ro mga raya sa Washington ag indi maga-umpisa ro pag-istorya hasta nga indi matuman ro mga kundisyon it nasyon.
Ginpahayag man ni Foreign Minister Abbas Araqchi ro parehong panawagan, kaibahan ro insigidang pagpundo it pagpamomba it Israel sa Lebanon.
Sa parte it Estados Unidos, maskin nga owa pa nagahambae ro White House, apang ginpahayag eon ni U.S. President Donald Trump sa sangka interview sa New York Post nga haum ro Amerika nga uman nga magpatigayon it military operations kun mapas-eawan ro pag-istorya. Dugang pa ni Trump, haum eon ro andang mga warships engkaso nga indi magbunga ro negosasyon.
Sa pihak kara, nagpahayag it positibong panan-awan si U.S. Vice President JD Vance, nga magapanguna sa delegasyon it U.S., apang nagpaandam man nga indi sanda magiging bukas sa anumang pagpangloko nga pagahimuon sa pag-istorya.
Sa pihak it daywang domingo nga ceasefire nga gin-anunsyo kan-o eamang, owa gihapon nagapundo ro mga pag-atake it Israel sa Lebanon, kaibahan ro mga airstrike nga ginabuhian it Israel, samtang nagapabilin nga sarado ro Strait of Hormuz nga ginakabig nga sangka importanteng ruta it pangkalibutanon nga suplay it langis.
