KALIBO, Aklan–Mabahoe ro posibilidad nga maiduso it pasueod nga bag-ong administrasyon ro plano kara nga pagsaylo it gobyerno it Pilipinas paadto sa Pederalismo.
Raya ro pagpati ni Bombo International Correspondent Denmark Suede it Sydney, Australia engkaso nga mabuoe ni incoming President Ferdinand “Bongbong” Marcos Jr. ro mayorya it kongreso.
Pila sa mga rason kung ham-an gustong iduso it Marcos administration ro Pederalismo hay para sa “economic progress” it nasyon.
Suno kay Suede, bukon it tanan nga nasyon nga nagpatuman it federal system hay naging maumwad bangud may pila nga nagapabilin gihapon nga pigado.
Ginsuhestiyon man kara nga mas mayad kung amyendahan eon lang ro economic provision it constitution sa baylo nga iduso ro Pederalismo eabi pa ag kakapirma pa eamang ni Pangueong Rodrigo Duterte it Public Services Act.
Matueopangdan nga may mga industriya nga ginapasugtan nga makaangkon it foreign ownership kung siin mabahoe raya nga bulig para maka-engganyo it maabu nga investor ag maka-kriar it trabaho para sa mga Filipino.
Sa idaeom it Pederalismo, daywa ro magiging gobyerno it nasyon.
Ginakaeakipan raya it federal ag ro ginaduso nga regional government sa sangka political system.
