KALIBO, Aklan—Nagpatigayon it massive Crown of Thorns Starfish ukon COTS extraction ro Provincial Environment and Natural Resources Office ukon PENRO Aklan sa kaeawran nga sakop it Brgy. Jawili ag sa isla it Boracay.
Suno kay Cecille Poblador, tagapaghambae it PENRO Aklan nga ro nasambit nga aktibidad hay sandig sa selebrasyon it Ocean Month makaron nga buean it Mayo nga may temang Protect and Restore EcoSystem and Biodiversity.
Ginpaathag ni Poblador nga sa Brgy. Jawili hay kapin sa 502.1 hectares ro kaeaparon it kaeawran nga may coral reefs rason nga kinahang-ean raya nga amligan.
Sa nasambit nga lugar, nakakolekta ro mga divers it kapin sa 93 COTS samtang sa Tambisaan, Boracay hay nakabueo sanda it masobra sa 300 ka mga COTS.
Ro nasambit nga specie hay posibleng makahalit sa coral reefs bangud nga ginsupsop it mga raya ro polyps it corals nga magatuga it pagkaparalisa it mga corals ag may tendency nga inde eon mag-abo pa.
Ro nasambit nga mga COTS nga nakolekta hay insigida nga gin-eobong sa nasambit nga mga lugar.
