KALIBO, Aklan—Gin-umpisahan eon it Provincial Engineering Office (PEO)-Aklan ro pag-ayos sa mga nasamad nga porsyon it karsada sa bahin it Brgy. Sigcay, Banga.
Raya hay kasunod it mga serye it pagkarumag it eugta matapos ro na-eksperyensyahan nga mabaskog nga pagbubu it uean ko mga nagtaliwan nga adlaw.
Suno kay Sangguniang Panlalawigan member Nemesio Neron nga insigidang naghimo it aksyon ro mga opisyales it barangay sa pagpanguna it anang asawa nga si Kapitana Alma Neron.
Agud nga malikawan ro pilang ka mga aksidente, nagbutang sigon sanda it reflectorized signages ag iba pang warning device sa lugar bilang paandam sa mga naga-agi nga residente ag motorista.
Ginpadumduman man kara ro mga motorista nga maging madahan sa pagmaneho para masiguro ro andang kaeowasan.
Dugang pa ni Neron nga padayun sanda nga nagahimo it pamaagi para madasig nga maayos ro karsada.
