KALIBO, Aklan—Eubos ro pagpasaeamat it mga opisyales ag residente it Brgy. Jumarap, Banga matapos ro ginpatigayun nga re-channeling it Provincial Engineering Office (PEO)-Aklan ag lokal nga gobyerno it Banga sa Aklan river.
Suno kay Kagawad Rolando Reyes it nasambit nga lugar nga mabahoe nga ginhawa ro pag-aksyon it mga natungdan nga ahensya it gobyerno agud nga maduea ro andang pagkabaeaka sa sigidas nga pagkinatimpa it eugta sa kilid it suba.
Mabuhay eon sigon nga ginaproblemahan it anang mga kasimaryo ro padayun nga pag-eapad it suba ag pagkarumpag it eugta tuga it mabaskog nga sueog it tubi ag mga na-eksperyensyahan nga pagbaha.
Sa kmatuoran suno kana hay nakapatigayun eon it bidding ko Disyembre 2021 para sa igapatindog nga revetment wall sa bahin it Brgy. Palale, Banga kung siin ro contractor it proyekto hay halin sa Antique.
Ro pondo sigon para sa konstruksyon it revetment wall hay naga-abot sa P50 million.
Nag-apela man si Reyes sa Department of Public Works and Highways (DPWH)-Aklan nga pukawon eon ro igtueopangod it contractor agud nga maumpisahan ro proyekto sa mas madali nga tyempo.
Dapat sigon nga kalitan it mga raya ro pag-ubra samtang manabaw pa ro tubi it suba.
