Ginklaro ni Engr. Moriel Macavinta it Provincial Engineering Office ukon PEO Aklan nga ro ginbutangan it krus nga porsyon it karsada nga sakop it Brgy. Man-up, Batan hay totally damage eon.
Angot kara, insigida sigon nanda nga gin-aksyunan ro nasambit nga reklamo ag haeos sangka span it half lane it karsada ro nasamad ag ginhimo eon lang nanda raya nga tatlong ka span agud nga maayos eon ro mga may crack nga daeanon.
Ginpahayag dugang ni Engr. Macavinta nga gilayon nanda nga ginaaksyunan ro mga ginareklamo kanda nga mga daeanon ag tayuyon ro andang trabaho kon manami man ro tyempo.
Madumduman nga mismong mga residente it lugar nga nagbutang it krus sa porsyon it karsada nga samad agud nga mataeopangdan eagi raya it mga byahero ag motorista bangud ginasugid nga takaw-aksidente ro nasambit nga lugar.
