KALIBO, Aklan—Ginpaathag it Provincial Engineering’s Office ukon PEO-Aklan ro mga kabangdanan sa pagka-delay it road construction sa provincial road nga sakop it Brgy. Bacan, Banga.
Suno kay Engr Moriel Macavinta, Maintenance Division it PEO-Aklan nga kapin sa 19 nga span it karsada ro nasamad ag kinahangean pa nga ma-rectify it contractor antes nga madeklara nga syento porsiyento nga tapos ro proyekto nga may kabilugan nga pondo nga 5 milyon pesos ko nagtaliwan nga dag-on.
Samtang, gindugang pa ni Engr. Macavinta nga nagapadayun ro pagbakbak it mga karsada matapos nga may dugang nga ginpaguwa nga 5 milyon pesos ro provincial government para sa repair it mga may lubak nga karsadahon nga sakop it Bacan, kaibahan ro Sigcay, Lapnag ag Taba-ao nga may kabilugan nga 168 span.
Sa oras nga matapos ro proyekto sa mga buean it Agosto, ginpasiguro it PEO nga masoehay eon ro pagbiyahe it mga motorista bangud nga haeos makompleto eon ro pagkaayad sa tanan nga mga samad sa karsada.
Imbes suno kana nga 10 inches ro damoe it karsada hay gin-obra nanda nga 12 inches kapareho it sukat it mga national highway agud nga indi basta-basta nga masamad it mga naga agi nga pribadong dump truck nga kaeabanan hay nagahalin sa quarry operation nga nagahakot it baeas.
Aminado man si Engr. Macavinta nga ro mga overloading nga 10 wheeler truck nga naga agi sa lugar ro kabangdanan it madali nga pagkasamad it mga karsada.
Problema man suno kana it mga naga-monitor nga tawuhan it bantay kalikasan ro kawad-an it instrumento nga maga-determina kon overloaded ro nasambit nga mga saeakyan.
Sa pihak nga parte, natigayon eon ma sigon nga mapangayuan it pondo ro iga-construct nga slope protection ag road shoulder sa natup-ay nga karsadahon it Brgy. Polo nga may budget nga kapin sa 10 milyon pesos.
