Kalibo Aklan ———–Ginsuhestiyon it Provincial Engineering Office ukon PEO-Aklan nga mas pang hugtan it Taskforce Kalikasan it gobyerno probinsyal ro andang monitoring kontra sa mga overloaded nga truck halin sa mga quarry sites sa banwa it Banga .
Raya hay kasunod it pirmeng pagkasamad it provincial road nga sakop it nasambit nga banwa.
Suno kay Engr. Moriel Macavinta, head it Maintenance Division it PEO-Aklan nga kinahangean man suno kana nga makaangkon it weighingbridge agud nga madaling matumod ro mga overloaded nga saeakyan partikular ro mga truck nga nagahakot it mga baeas, graba ag eapok sa quarry site.
Kaeabanan sigon nga nagatimbang it 20 tons ro overloaded nga truck nga indi masarangan it design it provincial road nga makasarang eamang it 8 tons nga kapasidad.
Sa pihak nga parte, gindugang pa ni Engr Macavinta nga natapos eon ro sangka span it nagapadayun nga rehabilitation ag concreting it nasamad nga karsada nga sakop it Barangay Bacan, Banga nga nauna eon nga ginareklamo it mga residente ag motorista bangud nga takaw-aksidente.
Haeos taeapuson eon lang sigon raya bangud nga ubos eon ro nakataeana nga budget para kara.
Ginpasiguro nana nga matibay eon ro andang gin-obra nga design bangud ro kadamoe kara nga 1 feet hay kapareho katibay it mga national highway.
Samtang, nataeupangdan sigon nanda makaron ro amat-amat man nga pagkasamad it karsada sa Barangay Lapnag, Banga.
