KALIBO, Aklan—Nagpanindugan makaron ro Provincial Engineer’s Office ukon PEO-Aklan nga owa sanda nahadlok ukon nagakabaeaka sa pihak it pagkuwestiyon it Commission on Audit ukon COA may kaangtanan sa andang mga proyekto.
Dugang pa kara nga hasta sa makarun hay owa pa sanda it may nabatun nga sueat angot sa nasambitan nga isyu.
Suno kay Engr. Moriel Macavinta it PEO-Aklan nga normal eamang nga gina-imbestigahan it COA ro pundo it nagkaeain eain nga ahensiya it gobyerno.
Bukon eun man sigon raya kanda it bag-o bangud makapilang beses eun sandang nakabatun it letter maghalin sa COA ag raya hay anda man nga na-settle.
Ro kinahangean eamang sigon hay ma-eksplekar it husto ag maisumite ro mga kinahangeanon nga papeles.
Madumduman nga nagpatigayon it imbestigasyon ro COA sa nagkaeain eain nga ahensiya it gobyerno kung sa siin naging kontrobersiyal ag naging sentro it isyu sa publiko ro may kaangtanan sa kuwestiyonable nga pundo it Department of Health ukon DOH kamana man ro taeatapan it Overseas Workers Welfare Administration (OWWA).
