KALIBO, Aklan–Sigidas makaron ro konstruksyon it Provincial Engineering Office (PEO)-Aklan sa mga samad-samad nga karsada sa provincial road nga sakop it Brgy. Bacan, Banga.
Suno kay Punong barangay Allen Robelo nga posibleng mabuksan eon sa mga masunod nga adlaw ro gin-repair nga porsyon it karsada sa atubang it kapilya it Iglesia ni Cristo.
Sa oras sigon nga matapos raya hay masunod man nga pagataw-an it igtueopangod it PEO ro karsada maeapit sa Bacan Elementary School.
Nasayuran nga naging takaw-disgrasya ro maabu nga pothole ag giltak sa daeanon nga sakop it andang barangay.
Ginapatihan nga ro pag-agi it mga daeagkuan nga saeakyan ag overloaded truck ro nagapangunang rason it madasig nga pagkamasad it provincial road.
Samtang, ginpaathag man ni Kapitan Robelo nga kompleto sa signage ro mga underconstruction nga karsada para masiguro ro kaeuwasan it mga motorista.
