Gin-anunsyo it Aklan Police Provincial Office ro temporaryong pagsuspinde it Permit to Carry Firearms Outside Residence (PTCFOR) bilang kaparte it pagpahaum sa seguridad para sa 2026 ASEAN Summit Meetings sa Isla it Boracay sa banwa it Malay.
Suno kay P/Capt. Aubrey Ayon, tagapaghambae it APPO nga maga-umpisa ro suspensyon ag pagbawae alas-12:01 it aga-aga it Pebrero 28, 2026 hasta alas-11:59 it gabi-i it Marso 8, 2026, kamana man sa Marso 21 hasta 28, Setyembre 17 hasta 27 ag sa Nobyembre 14 hasta Nobyembre 22.
Sakop it suspensyon ro mga miyembro it gun clubs, mga dealer, manufacturer ag repair shop it baril, ag mga pribadong nagapanag-iya it armas.
Magabutang man sigon sanda it mga checkpoint sa mga nagapangunang karsada, pantalan, ag sa paeuparan it Caticlan agud nga maid-id nga mabantayan ro pagsueod ag pagguwa it mga tawo ag saeakyan sa isla.
Pagapabaskugon man ro presensya it kapulisan sa mga hotel, resort, ag iba pang lugar nga pagahiwatan it mga aktibidad it summit.
Ro mga miyembro eamang it PNP, Armed Forces of the Philippines, ag iba pang law enforcement agencies nga nakauniporme ag una sa opisyal nga duty ro ginapasugtan nga magdaea it baril sa nasambit nga tiempo.
Ginpahayag pa ni Capt. Ayon nga kaparte ro nasambit nga tikang it ginpabaskog nga seguridad agud nga masiguro ro kalinong, kaeowasan ag kaayusan it publiko sa tiempo it ASEAN Summit 2026.
Kadungan kara, gin engganyo man nana ro publiko nga makipagbueuligan ag hugut nga magsunod sa nasambit nga direktiba.
Nasayuran nga naging madinaeag-on ro ginplastar nga security plan it Police Regional Office 6 sa ginpatigayon nga ASEAN Senior Economic Officials’ Meeting (SEOM) Retreat ko Disyembre 10 hasta 13, 2025.
