KALIBO, Aklan—Kinahangean nga mausisa anay ro permit to operate it daywang peryahan nga naga-operate sa banwa it Kalibo agud nga masiguro nga legal ro tanan nga mga hampang nga andang ginapatigayon.
Raya ro ginpahayag ni P/Maj. Mary Grace Borio, tagapaghambae it Police Regional Offfice ukon PRO-6 kasunod it ginareklamong operasyon it peryahan bangud sa gina-alegar nga daeagkuan nga pusta it mga nagahampang eabi eon sa color game.
Suno kana nga magahimo it tikang ro kapulisan kon matukiban nga illegal ukon owa nakabaehag sa gin-isyu nga permit ro mga games sa peryahan.
Sa pihak kara, aminado si Maj. Borio nga makabig nga sugae ro hampang kon may eakot nga bet money ukon taya.
Samtang, gin engganyo man nana ro publiko nga kon may mataeupangdan nga illegal gambling activities sa sueod it peryahan ukon sa iba pang mga lugar hay insigidang mag-report sa kapulisan agud nga maaksyunan.
