KALIBO, Aklan — May natumod eon nga “person of interest” ro mga otoridad angot sa brutal nga pagpatay sa sangka 14-anyos nga dalagita nga nasapwan nga nagaka-agnas eon nga bangkay sa maligwin nga parte it Brgy. Pagsanghan, Banga, Aklan.
Sa interview it Bombo Radyo, ginpahayag ni P/Corporal Jane Vega, tagapaghambae it Aklan Police Provincial Office (APPO) nga owa anay ginpahayag ro pangaean it nasambit nga “person of interest” bangud nga nagapadayun pa ro imbestigasyon.
Antes nga nakita ro bangkay it dalagita, daywang adlawn anay raya nga naduea nga nag-ea-ong eamang sa anang pamilya nga maga-agto sa sangka computer shop bandang alas-5:00 it hapon ko Mayo 6.
Base sa resulta it autopsy examination sa eawas it biktima, owa raya nahimuslan ag ro kabangdanan it anang pagkamatay hay tuga it pagbunae it matig-a nga bagay sa anang ueo ag pag-eu-ok.
Nasayuran nga sangka putoe nga butong ro nadiskubre it mga otoridad maeapit sa bangkay it biktima nga ginapatihan nga gingamit it suspek ukon mga suspek sa krimen.
