KALIBO, Aklan–Kapin sa 15-anyos eon nga naghalin sa Brgy. Ipil, Batan ro pamilya it ‘person of interest’ nga si Mark Archie Torrefiel sa pagpatay sa reliever branch manager it sangka pawnshop sa banwa it Kalibo nga si Bonna Hercia Ambay.
Suno kay Punong barangay Erlie Bulanag it Ipil, Batan nga mabuhay man nga tyempo nga nag-istar sa andang barangay ro pamilya ni Mark Archie.
Nasaksihan man sigon nanda ro pagbahoe it tatlong magmaeanghod antes sanda nagsaylo sa Metro Manila.
Base sa pag-usisa ni Kapitan Bulanag, natukiban nga may naging record it pagpanakaw sa andang barangay si Mark Archie may pilang dag-on eon ro nagtaliwan.
Nagpanawagan man raya sa pamilya it person of interest nga makipagbueoligan sa mga otoridad para mataw-an it hustisya ro pagkamatay it biktima.
Madumduman nga nasapwan eon lang nga nagahamyangon ag nagapaligos sa kaugalingon nga dugo ro biktima sa sueod mismo it pawnshop kun siin imaw nagatrabaho ko Lunes it agahon.
Nauna eon nga ginpahayag pilang residente it Brgy. Cajilo, Makato nga nagpaeagiw eon paadto it Metro Manila ro suspek kaibahan ro anang live-in-partner ko Dominggo it gabi-i.
Sa makaron hay nagapadayun pa ro hot pursuit operation it mga kapulisan para sa insigidang pagka-aresto sa suspek.
