KALIBO, Aklan—Pursigido ro ina ni Rochelle Ann Rodriquez, 19 anyos nga nasapwan sa sapa nga nagakaagnas sa Sitio Mangga, Brgy. Torralba, Banga nga padayunon ro kaso nga ginpasaka sa daywang ka mga person of interest sa insidente.
Suno kay Olivia Rodriguez, nanay it biktima nga antes pa man nakit-an ro bangkay it anang onga hay nag-adto ro mga raya sa andang panimaeay ag nag-inuman kon sa siin pagkahilong hay nagatangis nga nagpangayo it pasensya kana ro sambilog.
Apang, uwa gid sigon imaw kasayod kon sin-o ro karelasyon it anang onga sa daywa ag aminado imaw nga barkador nga husto ro babaye hasta nga nasapwan eon lang raya nga uwa it kabuhi ko Hunyo 12.
Ginpahayag dugang it ginang nga umako si Noriel nga may kahilabtanan sa krimen apang ro sambilog hay nagapakamatig-a.
Samtang sa pihak nga parte, ginkumpirma ni PCapt. Benny Jones Mendoza, hepe it Banga PNP Station nga murder ro kaso nga ginpasaka sa korte kontra sa daywa kon sa siin ginahueat eon lang nanda ro case build up.
Raya pa eamang sigon ro kaso nga andang ginpasaka bangud nga uwa pa gid naestablisar kon nahimuslan ro babaye antes nga ginpatay.
Apang, ro klaro hay multiple stab wounds ag ro lastro sa anang ueo nga agi it pagsampok ro ginkamatay it biktima.
Sa makaron suno kana hay nagapadayon gihapon ro imbestigasyon sa krimen bangud nga posibleng sa ibabaw it sapa ginhimo ro krimen ag ginhueog eamang ro bangkay sa idaeom kon sa siin imaw nakit-an.
