BANGA, Aklan—Personal nga naka-istorya it nag eskapo nga preso nga si Jerick Ocampo Ramirez alyas Stanley Mercado ro anang ina nga si Dolores Ramirez sa Bansud, Oriental Mindoro pinaagi sa pagtinguha it Bombo Radyo Kalibo.
Ginhinyu sigon it suspek nga mabuligan imaw nga ma-contact ro anang pamilya agud nga makapangayo it bulig sa mga kaso nga anang ginapangatubang .
Naging emosyunal imaw matapos nga mabatian ro boses it anang ina, kun sa siin hinyu nana nga mabisita imaw ag mapadaehan it kwarta nga pangbakae it pagkaon.
Nagpangayo man imaw it tawad sa anang gin-obra ag ginpahayag nga hinadlukan eamang imaw rason nga nagtakas.
Samtang, ginpahayag it anang ina nga bangud sa andang edad it anang asawa nga haeos 80 anyos eon ag malisod nga pagpangabuhi hay medyu imposible nga makabiyahe sanda ag mabisita imaw sa presuhan .
Bangud kara, ginpahayag it suspek nga atubadngon eon lang nana nga naga-isaeahanon ro mga kaso nga anang ginapangatubang .
Nasayuran nga pagpangisda ro pangabuhian it andang pamilya sa Mindoro.
Ro suspek hay may live-in partner nga idtu makaron sa Manila.
