KALIBO, Aklan—Ginklaro it pamunuan it “Peryahan ng Bayan” nga legal ag otorisado sanda nga magpatigayun it hampang sa bilog nga nasyon.
Raya hay kasunod it ginbuhian nga pahayag it Philippine Charity Sweepstakes Office (PCSO)-Aklan nga suspendido ro andang operasyon.
Suno kay Atty. Bernard Vitriolo, Vice President for Legal Affairs it Peryahan ng Bayan nga owa it kamatuoran ro alegasyon it PCSO bangud nga may legal sanda nga basehan sa pagpatigayun it mga hampang.
Raya sigon hay suportado it pilang dokumento kaeakip ro kontrata nga ginpirmahan mismo it PCSO ko 2014.
Apang, ko 2016 suno kana hay gusto eon it ahensya nga i-terminate ro operasyon it Peryahan ng Bayan rason nga ginpasaka nanda sa korte ro isyu.
Base sigon sa desisyon it Court of Appeals, indi pwede nga suspendihon it PCSO ro kontrata it Peryahan ng Bayan nga owa nag-agi sa arbitration.
Sa makaron hay padayun pa sigon nga ginapamatian ro reklamo sa arbitration proceeding.
Ginkondena man ni Atty. Vitriolo ro padayun nga pagkwestiyon it PCSO sa andang operasyon.
Ginpahayag pa kara nga nagatao sanda it share apang owa raya ginabaton it PCSO kamana man nga gin-closed ro andang account.
