KALIBO, Aklan—Nagpanindugan si Atty. Bernard Vitriolo, vice president for legal affairs it Globaltech Mobile Online Corporation ukon GMOC nga may legal nga baeasihan sa operasyon it Peryahan ng Bayan sa probinsiya it Aklan ag bilog nga nasyon.
Sa interview it Bombo Radyo, gintumod ni Vitriolo ro ginpaguwa nga status quo ante order it Court of Appeals nga may petsang Enero 14, 2019 nga nagapabor sa andang operasyon.
Padayun sigon nga naka-pending sa arbitrary tribunal ro andang kaso kontra sa Philippine Charity Sweepstakes Office ukon PCSO.
Pilit sigon sanda nga ginasamaran matapos nga paboran it PCSO ro operasyon it small town lottery ukon STL.
Mabahoe man ro anang pagpati nga raya hay may eamod pamulitika.
Sa pihak nga parte, gindugang pa ni Atty. Vitriolo nga pagakasuhan nanda ro mga nagamandu nga arestuhon ro andang mga sales agent kamana man ro magadeklara sa andang operasyon nga illegal.
Madumduman nga daywang manugpataya it Peryahan ng Bayan ro gin-aresto sa pag-eabag sa illegal gambling ko nagtaliwan nga adlaw sa banwa it malay ag isla it Boracay.
