KALIBO, Aklan–Uman nga nagpaandam ro Provincial Employment and Services Office ukon PESO-Aklan sa mga nagaplano nga magtrabaho sa ibang nasyon partikular sa Korea may kaangtanan sa language center scams.
Raya hay angot sa advisory nga ginpaguwa ko Oktubre it nagtaliwan nga dag-on it Philippine Overseas Employment Administration ukon POEA.
Apang bangud nga padayun nga may nabibiktima it scam hay uman nanda raya nga ginpaguwa sa publiko.
Suno kay Ms. Vivian Ruiz-Solano, manager it PESO-Aklan nga modus sigon kara nga naga-imbita it mga aplikante nga magpa enroll sa mga language courses kapareho it Korean ag nagapromisa nga pagataw-an it trabaho pagkatapos sa nasambit nga nasyon.
Agud nga mas pa nga maka-engganyo, ginasugid nga ginagamit it nasambit nga mga Korean language training centers ro logo ag pangaean it POEA nga owa it nagakaigo nga permiso.
Ginpaandaman man nana ro publiko angot sa promisa it nasambit nga mga Korean language training center nga nagatau it test of proficiency sa Korean language pinaagi sa employment permit system it Korea agud nga makaangkon it kasiguraduhan nga makabo-oe it trabaho.
Ginpahayag ni Solano nga ro POEA government placement branch nga nagatutok sa government to government facility sa human resources development service it South Korea hay owa it may ginsudlan nga kasugtanan sa anuman nga language training centers, eskwelahan ukon institute bilang kaparte it EPS program.
Ginahinyo man ni Solano ro publiko nga i-report ro anuman nga makadueudang aktibidad angot sa recruitment scams.
