KALIBO, Aklan—Padayun nga gina-imbitahan it Public Employment Service Office ukon PESO-Aklan ro tanan nga mga interesadong naga-usoy it trabaho nga magdangop sa andang taeatapan ag magdaea it mga kinahangeanon nga dokumento bangud nga uman nga magapatigayon sanda it “hiring” para sa mga gustong magtrabaho eabi eon sa ibang nasyon.
Suno kay Sharon Julian it PESO-Aklan nga may una nga job opening nga ginatanyag ro sangka agency para sa mga skilled workers paagto sa Qatar, Saudi Arabia, Japan ag UAE.
May job vacancy man ro Saudi Arabia ag Qatar nga mga domestic helpers samtang mga caregivers man ro gina-usoy it Japan ag Australia.
Naka-schedule sigon ro interview sa Hulyo 30 hasta 31.
Pila sa mga requirements nga kinahangean nga daehon hay ro passport, picture, certificates of trainings and employments sa mga local experiences ag iba pa.
Ro mga ginabaton nga aplikante hay naga-edad it 24 to 40 years old.
Nasayuran nga ko nagtaliwan nga Hulyo 22 ag 23 hay nakaangkon man it recruitment activity ro sangka agency kun sa siin ro mga job vacancy hay para sa mga skilled workers sa New Zealand, nurses sa Germany ag Singapore ag mga domestic helper sa Hong Kong, Malaysia, ag Singapore.
May mga nag apply man nga carpenter, electrician ag private tutors.
Gin-engganyo man it PESO ro publiko nga makipag-angot sa andang taeatapan para sa mga dugang nga detalye angot sa mga nasambit nga job vacancies.
