KALIBO, Aklan—Uman nga ginpasugtan ro PetroWind Energy Incorporated nga makapresentar sa sangguniang bayan it Malay it andang mga plano ag mitigating measures sa andang proyekto sa nasambit nga banwa.
Suno kay Van Peralta, assistant vice president for corporate communication nga mabahoe eon nga development para sa andang bahin nga gintaw-an sanda it uman it kahigayunan agud nga maipresentar ro andang mga plano para sa proyekto nga inde matabo ro ginakahadlukan it mga residente ag iba pang environmental protection group nga maapektuhan ro Nabaoy river nga sambilog sa mga source it tubi nga ginagamit it water concessionaire sa isla it Boracay.
Dugang pa ni Peralta nga natapos eon ro andang road construction para sa igapatindog nga tatlong turbina sa lugar ag uwa sigon sanda it nakit-an nga adverse effect kaparehas sa mga naunang pahayag nga makasamad raya sa kabukiran ag maapektuhan ro kasubaan it banwa rason nga nakabinbin ro andang proyekto.
Pagpasiguro nana nga bukas ro andang kumpanya sa pagtambong sa mga pagpamati nga igapatigayon it sangguniang bayan it Malay.
