KALIBO, Aklan—Ginbuksan eon ro phase 1 ag 2 it circumferential road sa isla it Boracay.//Ro nasambit nga karsada sa phase 1 hay halin sa Cagban Port hasta sa Bolabog Dramatic Road nga may habang 4.47 kilometers samtang ro phase 2 hay halin sa Elizalde hasta sa Rotonda nga may sukat nga 3.36 kilometers.
Suno kay Engr. Leo Bionat, Assistant District Engineer it DPWH-Aklan nga ro pagbukas it phase 1 ag 2 it circumferential road hay ginpangunahan ni Department of Public Works and Highways (DPWH) Secretary Mark Villar ag iba pang mga nagtambong nga lokal nga opisyal.
Sa nasambit nga proyekto, gin-obra raya nga konkreto, mas ginpaeapad ro karsada, ginbutangan it drainage system, street lights, road safety markings ag gin-eaparan pa ro pedestrian sidewalk.
Mag-eowas sa pagbukas it phase 1 ag 2 it proyekto, gin inagurahan man ro 800-meter section nga daean sa parte it Laketown.
Ginapahayag nga sa tiempo nga makumpleto eon ro nasambit nga proyekto ag maagyan eon it mga motorista, ginaeauman nga maga abot eon lang sa 40 hasta 45-minuto ro biyahe halin sa Cagban Port sa Brgy. Manocmanoc hasta sa Ilig-Iligan Beach sa Brgy. Yapak halin sa presenteng sang oras ag 30 minuto.
Ro nasambit nga proyekto hay nagabalor it P890-milyon pesos.
Ro nabilin nga section it karsada hay nagakinahangean pa sigon it haeos P1.13-milyon pesos nga pondo.
