KALIBO, Aklan — Gin-insister it Caticlan Boracay Transport Multi-Purpose Cooperative (CBTMPC) nga kinahang-eang ipaiway hasta sa 2023 ro implementasyon it mandato it Maritime Industry Authority (MARINA) sa phase-out it mga pampasaherong baroto nga human sa kahoy kabaylo it fiber glass.
Sa session it Sangguniang Panlalawigan it Aklan, ginpahayag ni Godofredo Sadiasa, chairman it CBTMPC nga sa makaron hay siyam pa eamang ro andang nagabyaheng pumpboat nga fiber glass ag 59 ro human sa kahoy.
Kon ipadayon ro pagpatuman, pwede sigon nga maapektuhan ro andang mga miyembro ag empleyado kamana man ro industriya it turismo sa Boracay.
Dag-on 2021 pa sigon mapaso ro andang franchise nga gin-isyu man it MARINA.
Dugang pa ni Sadiasa nga amat-amat eon nandang ginahimo ro upgrading it andang mga units sa fiber glass nga ro kada isaea hay nagabalor it haeos P7.5 milyon.
Mag-eowas kara, may mga utang pa sigon ro kooperatiba nga kinahang-ean bayaran sa nagkaeain-eaoin nga financing companies hasta sa 2021 nga ginamit sa pagpaobra ag pagpa-ayos it andang mga bangka.
Samtang, ginpahayag sa Bombo Radyo ni SP consultant Odon Bandiola nga ginpaburan it mga Aklan board members ro hinyo it kooperatiba pamaagi it sangka resolusyon.
Ro mandato it MARINA hay ginaeaumang maipatuman makaron nga dag-on.
