Magapangatubang sa nagakaigong kaso ro sangka reservist it Philippine Army matapos nga magpanutok it baril kay Punong Barangay ag ABC President it Kalibo Ronald Marte sa Kalibo International Airport matapos nga mag-eontad ro sangka road rage.
Base sa report, ginkilaea ro suspek nga si Armando Dumangon ag residente it Maayon, Capiz ag Bodyguard ni Publishers Association of the Philippines, Chairman Emeritus Johnny P. Dayang.
Ginpahayag nga nagapaguwa eon it parking area ro saeakyan it kapitan sakay ro anang pamilya kat gin baeabagan it suspek ro anang daean.
May kaangtanan kara, ana sigon nga ginkutana ro suspek apang sa baylo nga magsabat hay ana nga ginbuyayaw ro kapitan kadungan it pagpanutok it baril.
Bangud kara, gilayon nga gin-alarma ni Marte ro mga security guard it paeoparan apang madasig nga napaharurot it suspek ro ginamaneho kara nga saeakyan.
Sa follow-up operation it Kalibo PNP, naaresto ro suspect sa sangka hotel samtang nagapangape kaibahan ro anang amo nga si Dayang.
Narekober sa sueod it behikulo ro 45 pistol nga armas nga imaw sigon ro gintutok it suspek kay Marte.
Sa makaron ro suspek hay presenteng nakakulong sa Kalibo Police Station para sa nagakaigong disposisyon.
