KALIBO, Aklan—Naglunsar it sangka programa ro Philippine Carabao Center ukon PCC para sa mga mangunguma sa probinsya it Aklan.
Ro kada mapili nga recipient hay magabaton it sambilog nga anwang nga andang paga-alagaan ag paga-gatasan.
Suno kay Mr. John Kyrich Delfin, focal person it PCC nga tuyo it rayang programa nga makatao it dugang nga paeangitan-an sa mga local farmers.
Ginapahayag nga kabulig sigon nanda ro Philippine Coconut Authority sa pag-identify it mga benipisyaryo kung sa siin nakalista sanda it 20 ka mga recipient sa Brgy. Mobo, Kalibo ag 25 nga recipient sa tatlong barangay sa banwa it Balete.
Antes sigon ro distribusyon it mga anwang sa Enero 2021 hay makaangkon anay sanda it seminar sa mga recipient agud nga maipaathag kanda ro andang obigasyon.
Ginapahayag dugang nga sangka crossbreed carabao sigon ro andang igatao kung siin ro kada gatas nga makolekta it mga mangunguma hay iga-process para maging fresh milk nga pagabak-eon man kanda it pilang ahensya it gobyerno kapareho it Department of Education agud nga gamiton sa mga feeding program.
