Ginkumpirma it pumunuan it Diocese of Kalibo nga ro mga leader it Philippine Catholic Church kaibahan ro papal nuncio hay magaadto iya sa probinsya it Aklan para sa plenary assembly nga sa tumaeagsahong kahigayunan hay pagahiwaton raya sa guwa it Metro Manila.
Suno kay Fr. Tudd Belandres, kora paroko it St. John the Baptist Cathedral nga ro plenary assembly it Catholic Bishops’ Conference of the Philippines (CBCP) hay igapatigayon sa Marzon Hotel sa Jaime Cardinal Sin Avenue sa banwa it Kalibo, Aklan halin July 8 hasta 10, 2023.
Dugang pa nana nga ro 126th plenary hay ro ikaywang parte it andang aktibidad pagkatapos it andang annual retreat halin July 4-6, 2023.
Ro CBCP plenary assembly hay ro twice-a-year meeting nga ginapasakupan it Philippines’ 88 active bishops, 37 retired ukon resigned prelates ag daywang diocesan priest administrators.
Dugang pa ni Fr. Belandres nga una eon sanda sa 60-70 porsyento it andang preparasyon para sa kadaeag-an it mabahoe nga aktibidad.
Angot kara, nagpanawagan it pangamuyo si Bishop Jose Corazon Talaoc, D.D para sa mga obispo nga magapadaueong sa probinsya it Aklan.
Pagkatapos it andang plenary assembly hay magadiretso ro mga raya sa isla it Boracay.
Nasayuran nga ro CBCP plenary assembly hay masaming ginapatigayon sa Pope Pius XII Catholic Center sa Manila apang ko 2019, napagdesisyunan sigon it mga obispo nga bumalik sa regional meetings ag regional assemblies kon sa siin ko 2016 ag 2018 hay ginbali it CBCP ro tradition ag ginhiwat ro plenary assemblies sa Cebu.
