Nagaapela ro Philippine Chamber Commerce Industry ukon PCCI sa Aklan Electric Cooperative ukon Akelco nga panabaan kara ro hana nga pag-imponer it surcharges sa mga consumer members nga delay magbayad it andang electric bill.
Suno kay PCCI Aklan chairman of the board Ramel Buncalan, masyadong mataas ro 10 porsyento nga ginaplano it Akelco rason nga ro andang organisasyon hay magasumite it apela nga himuon raya nga dos porsyento.
Ginpaathag nga bastante ag masarangan eon ro dos porsyento kaysa sa 10 porsyento nga masyadong mataas ag dugang nga pabug-at sa mga konsumidor.
Aminado sanda nga naga-eampas sa due date ro andang pagbayad it andang electric bill bangud nga may iba pa sanda nga ginabayaran eabi eon ag naagyan it pndemya ro kalibutan kon siin eubus nga naapektuhan ro business sector.
Ginpahayag dugang ni Buncalan nga naintindihan nanda ro rason it Akelco kon ham-an it plano nandang mag-imponer it surcharges bangud nga sanda man ro nagapas-an sa penalidad nga gina-imponer it power distributor sa oras nga madelay ro andang payment bangud ro ibang konsumedor hay ginahueat anay ro disconnection antes nga magbayad sa andang obligasyon.
Igasumite it business sector ro andang apela sa igapatigayon nga annual assembly it Akelco sa maabot nga adlaw it Sabado, Hulyo 30.
