KALIBO, Aklan–Padayun ro pagpadumdom it Philippine Consulate sa New York sa mga Filipino nga magdoble dahan eabi eon kung nagapamasyar sa estado.
Raya hay kasunod it mga nagakatabo nga hate crimes sa mga Asyano.
Suno kay Bombo International Correspondent Greg Aguilar it California, USA nga kaabuan sa mga bag-ong nailistang kaso it hate crimes hay halin sa New York City.
Partikular nga gina-abisuhan sigon ro mga Pinoy nga bag-o eamang sa lugar ag mga senior citizen nga maging madahan ag dapat may kaibahan kung nagaguwa.
Dapat sigon nga likawan it mga raya ro pag-adto sa mga lugar nga may mataas it kaso it hate crimes.
Madumduman nga ko kan-o eamang kat gin-atake it sangka African-American ro sangka 74 anyos nga Pinay sa bahin it New York kung siin ro insidente hay nabue-an pa it video.
