Kalibo, Aklan-Nakataeana eon man nga magatukod ro Philippine National Police it panibag-ong site para sa andang ginaproponer nga agri-aqua project sa banwa it libacao.
Suno kay Soviet Russia dela Cruz , head it Aklan Agri-Aqua Demonstration Farm and Training Center nga nakaangkon sanda it inisyal nga pag-istorya ni Capt. Dexrel Tortoya it PNP Aklan Command angot sa posibleng partnership sa pagtukod it nasambit nga proyekto nga igabutang sa Brgy. Manika sa nasambit nga banwa.
Natalakay sigon nanda nga iga-pattern raya kapareho sa naga-eksister eon nga agri-aqua farm sa Brgy. Rosal pinaagi sa bulig it Technical Education and Skills Development Authority ukon TESDA ag PNP .
Sa makaron hay gina estudyuhan pa ro lugar nga pagabutangan it proyekto agud nga masayuran kon ano ro mga nagakabagay kara nga tanum nga igabutang , mga isda nga paga-alagaan ag iba pang kasapatan.
Target sigon kara nga mapabaskog ro productivity kun sa siin posibleng maka-supply ro libacao sa kinahangeanon nga mga produktong agricultural it mga pumueuyung aklanon partikular sa isla it boracay bangud sa demand.
Angot kara, gin imbitahan sigon nana si Capt Tortoya , kaibahan ro ibang mga farmers ag mga tawuhan kara sa command center sa Aklan Agri-Aqua Demonstration Farm and Training Center agud nga makita ro andang mga pananum eabi eon ro andang melon nga pasaka ro pagtubo ukon vertically growing kabaliskaran sa nakasanayan nga pakarang sa eugta ag iba pang tinuean-on sa bahay-kubo.
Ginpasiguro man nana nga haum nga magbulig ro provincial government sa pagtau it assistance agud nga mapabaskog ro agri-aqua products sa probinsiya.
