KALIBO, Aklan—Gin-engganyo it Philippine Pharmacists Association – Aklan chapter ro publiko nga sa mga lehitimong drug stores ag pharmacies eamang magbakae it bueong ag indi sa mga baraka ukon sari-sari stores nga bukon it otorisadong magbaligya it nasambit nga produkto.
Suno kay Melissa Reloj-dela Cruz, presidente it PPA – aklan nga maskin nga mabahoe nga bulig kunta ro mga baraka, apang indi malikawan kon amat nga makabakae it mga peke nga bueong nga ginabawae sa idaeum it laye.
Ginpahayag dugang nga may gin-turn-over kanda ro tag-ana it sangka baraka nga mga peke nga bueong nga kaeabanan hay nag-eupok nga mga soft gel capsule nga nabakae sigon nanda sa nagalibod nga ahente it sangka kompaniya.
Ginahueat pa sigon nanda ro findings it food and drug administration ukon FDA region 6 sa ginsumite nga waeong klase it bueong nga ginapatihan nga fake drugs.
Gindugang pa ni Dela Cruz nga sa idaeum it Section 30 it Republic Act No. 10918 ukon mas kilaea bilang Philippine Pharmacy Act, ro mga FDA-licensed retail drug outlets ukon pharmacies eamang ro ginapasugtan nga magbaligya it bueong sa consuming public.
Makabig suno kana nga makahaeadlok ag delikado ro fake medicines.
Bangud kara, pabor suno kana imaw sa mandu ni DILG sec Eduardo Año nga naga engganyo sa mga local government units nga magpaguwa it ordinansa sa nasambit nga ban.
