Plantsado eon it Philippine Team ro andang pagahimuon nga pag-martsa para sa opening ceremony it Paris Olympics.
Ginpahayag ni Philippine Olympic Committee (POC) President Abraham “Bambol” Tolentino nga pagapangunahan nanday Pinoy boxer Nesthy Petecio ag Carlo Paalam ro parada kaibahan ro 16 nga iba pang mga atleta.
Inde makaibahan si Tolentino sa parada bangud nga ginpili nana nga magpungko sa family section sa kilid it River Seine.
Kaibahan nanday Paalam ag Petecio ro kaparehong boksingero nga sanday Aira Villegas ag Hergie Bacyadan, hurdlers Lauren Hoffman ag John Cabang Tolentino, swimmers Kayla Sanchez ag Jarrod Hatch, gymnast Aleah Finnegan ag fencer Samantha Catantan.
Makasakay sa baroto nga nakataeana sa Pilipinas sanday Chef de Mission Juanito Victor “Jonvic” Remulla ag pilang sports officials Michael Angelo Vargas it swimming, Marcus Manalo it boxing, Cynthia Carrion Norton it gymnastics, Patrick Gregorio sa rowing ag Agapito “Terry” Capistrano sa athletics.
Magaumpisa ro Opening ceremony it bandang alas-7:30 it gabi sa Paris ukon ala-1:30 it aga-aga sa Pilipinas it Sabado.
Magiging makasaysayan ro nasambit nga Paris Olympics bangud nga inde raya pag-ipatigayon sa sangka stadium ag sa baylo hay himuon sa Seine River.
Samtang sa pihak nga parte, ginpahayag it mga French authorities ro pagka-nutralisa sa pilang mga paeag sa 2024 Paris Olympics antes pa man ro daeayong pagbukas it pinakamabahoe nga torneyo sa bilog nga kalibutan.
Ginakaeakipan raya it sangka 40 anyos nga Russian nga naaresto sa ana mismong apartment ag nagaplano sigon it i-destabilize ro Olympic Games.
Imaw ro gin-akusahang nagapatigayon it intelligence work ag may plano sigon nga mag-umpisa it kinagamo sa France.
