KALIBO, Aklan—Mabahoe nga dungog nga makapasakop ag i-representar ro Pilipinas sa 32nd Southeast Asian ukon SEA Games sa Cambodia.
Suno kay Hanna Mae Ibutnande nga naging malipayon sanda sa naging performance it Philippine team sa pencak silat ag kun bokator.
Kabilugan nga 28 nga atleta ro nagpasakop nga ginpangunahan it defending women’s seni tunggal champion Mary Francine Padios.
Sa nasambit nga numero, lima ro naghalin sa Aklan nga ginaeakipan nanday Shara Julia Jizmundo, Hanna Mae Ibutnande, Jasper Jay Lachica, Zandro Fred Jizmundo Jr. ag si Padios.
Maskin sigon nga owa nadepensahan ni Padios ro anang titulo, apang gin-obra nanda ro tanan rason nga maabu sa andang kaibahan ro nakahakot it medalya eakip ro mga Aklanon players.
Madumduman nga si Padios ro atleta nga nakabo-oe it unang gold medal para sa nasyon ko nagtaliwan nga seagames sa Vietnam ko 2022.
Sumabak ro pencak silat team sa 17 nga events sa idaeum it pencak silat ag 9 nga events sa kun bokator artistic, sangka traditional martial arts sa Cambodia.
Nasayuran nga first time nga sumabak sa seagames ro mag-igkampod nga tubong aklan nga sanday Shara Julie ag Zandro Fred Jizmundo Jr., kaibahan si Lachica.
Ro aklanon man nga si Freddie Jizmundo Jr., ro nagaserbi sigon makaron nga head it national team coaching staff.
Ginpahayag dugang nga pila sa mga player nga sumabak sa kun bokator hay nag uli eon sa nasyon samtang sa Mayo 13 ro iba pa bangud nga may nabilin pang event sa pencak silat.
