Nagpaandam ro Philippine Space Agency (PhilSA) nga posibleng may tumugpa nga debris halin sa rocket nga ginbuhian it China maeapit sa Cagayan ag Ilocos Norte.
Suno sa PhilSA, ginlunsar it China ro Long March 7A rocket halin sa Wenchang Space Launch Site sa Wenchang, Hainan bandang 12:16 it aga-aga it Mayo 27.
Kaibahan sigon sa mga drop zone ro mga masunod nga lugar sa drop zone 1 sa 41 nautical miles halin sa Burgos, Ilocos Norte, 62 nautical miles halin sa Dalupiri Island, Cagayan.
Ro drop zone 2 hay sa 69 nautical miles halin sa Santa Ana, Cagayan, 81 nautical miles halin sa Camiguin Norte.
Paandam it ahensya, maskin nga owa ginaeauman nga magatama sa mga kabaeayan ukon kaeugtaan, pwede raya nga magtuga it peligro sa mga barko, eroplano, baroto nga pangisda, ag iba pang saeakyang-pandagat.
Ginlaygayan man ro publiko nga indi magpaeapit ukon pueuton ro anumang makadueuda nga debris bangud nga posible raya nga mag-angkon it makahieilo nga kemikal kapareho it rocket fuel.
