KALIBO, Aklan—Humakot it mga medalya ro Philsilat Sports Association sa ginpatigayon nga Sarawak Premier International Silat Championships 2023 nga ginpatigayon sa Malaysia.
Sambilog eon kara si Ms. Hanna Mae Ibutnande nga nakauli it bronze medal sa kategoryang Tanding Class C.
Suno kana, nagtinguha sanda nga makauli it mga medalya kon sa siin pamaagi sigon raya agud nga pasaeamatan ro Philippine Sports Commission ag ro andang mga coaches sa suporta ag pagsalig nga ginata-o kanda.
Antes pa man nakakuhit it medalya hay nagpaidaeom sanda sa maid-id nga isolation training sa Baguio kon sa siin mabahoe nga adjustment ro andang ginhimo bukon eamang it sa andang kaugalingon kundi maging sa environment nga andang ginahueagan.
Maskin nga maabong kalisod ag kabudlay nga inagyan hay nagpangibabaw gihapon ro Pilipinas kontra sa ibang nasyon nga nagpasakop man sa nasambit nga kompetisyon.
Samtang sa pihak nga parte, naging emosyonal man si Ibutnande sa anang ginatamasa makaron nga kadaeag-an bangud nga raya sigon tanan hay haead nana sa anang bilog nga pamilya ag sa ana mismo nga ina nga halin sa umpisa hay uwa nagkueang sa suporta ag pagpalakas sa anang loob.
Sa pihak it kasubo nga naagyan it andang pamilya sa pagtaliwan it andang ina, uwa sigon imaw nadueaan it pag-eaum ag mas pang nagpursige sa ana nga handom eabi eon sa sports nga anang ginsueod.
Si Ibutnande hay sangka 3rd year college student sa kursong Bachelor of Science in Education major in Physical Education sa sangka eskwelahan sa Metro Manila.
