KALIBO, Aklan—Nagapadayun makaron ro kampanya it Provincial Health Office ag Department of Health angot sa National Safe Motherhood Program para sa tanan nga mga ina sa bilog nga nasyon.
Suno kay Ms. Patty Legaspi, Nurse 1 ag National Safe Motherhood Program Coordinator it PHO-Aklan nga nakatutok ro programa sa health status it sangka ina eabi eon sa tyempo it anang pag-nabdos hasta sa pag-unga agud nga ma-monitor ro anang kahimtangan.
Importante sigon ro prenatal kun naga-nabdos ro sangka babaye kamana man ro postpartum visits matapos nga mag-unga.
Makabig suno kana nga “very crucial ag important stage” ro first 1,000 days umpisa sa unang adlaw it pagnabdos it sangka ina hasta nga magdaywang dag-on ro unga.
Sa raya sigon nga tyempo kinahang-ean nga matutukan ro health it nanay bangud dikara man nakasalalay ro health status it anang eapsag.
Gina-engganyo man kara ro mga kababayin-an nga indi magduha-duha sa pagdangop sa mga health centers agud masayuran ro andang kondisyon kamana man agud magiyahan sanda sa tamang pamaagi it pag-alaga it andang sarili ag andang baby.
