KALIBO, Aklan—Gin-engganyo it Provincial Health Office (PHO)-Aklan ro publiko nga insigidang mag-isolate engkaso nga may nabatyagan nga sintomas angot sa Coronavirus Disease 2019 ukon COVID-19.
Suno kay Dr. Cornelio Cuatchon Jr. it PHO-Aklan nga kun may mga ginabatyag nga sakit kapareho it ubo, eagnat ag sip-on mas mayad nga insigidang mag-isolate agud nga indi eon makatapon sa ibang miyembro it pamilya.
Kaeabanan sigon sa mga nagpositibo hay puro magpamilya ag may gina-angkon nga sintomas ukon symptomatic.
Aminado man si Dr. Cuatchon nga masyado eon nga abo ro kaso it COVID-19 sa Aklan kun siin indi sigon raya masarangan nga mapanaba sa sueod it daywang dominggo maskin nga ginpaidaeom eon sa Modified Enhanced Community Quarantine (MECQ) ro probinsya.
Tuyo sigon it taeatapan nga mapadasigan ro contact tracing sa mga high risk contact it mga pasyente agud insigidang maabisuhan nga mag-self isolate.
Matueopangdan nga naka-record ro Aklan it kapin sa 595 ka mga bag-ong kaso it deadly virus sa sueod eamang it tatlong adlaw umpisa Agosto 1 hasta 3.
Mag-eowas kara, nakalista man ro porbinsya it sambilog pang dugang nga kaso it Beta variant kasunod it ginpagguwa nga resulta sa whole genome sequencing it Philippine Genome Center ko Hulyo 28.
