KALIBO, Aklan—Gina-engganyo it Provincial Health Office (PHO)-Aklan ro mga kababayin-an nga pillion nga mag-unga sa mga ospital ukon health centers.
Raya hay para malikawan ro anumang infection ag komplikasyon sa parehong ina ag eapsag.
Suno kay Ms. Patty Legaspi, Nurse 1 ag National Safe Motherhood Program Coordinator it PHO-Aklan, kinahang-ean nga mataw-an it nagakaigo nga pagtatap ag medikasyon ro mga babaye nga bag-ong unga ag ro andang baby.
Mabahoe sigon ro maibulig it public health promotion para ma-engganyo ro mga ginikanan nga magbisita sa health centers.
Aminado man si Nurse Legaspi nga nakalista sanda it pagnaba sa numero it mga kababyin-an nga gustong mag-unga sa ospital ukon mga birthing facility.
Mabahoe suno kana ro epekto it surge it COVID-19 infection sa nasyon sa pagkabaeaka nga matapnan sanda it virus rason nga mas ginapili it mga nanay nga mag-unga sa anda mismong panimaeay.
Raya sigon ro sambilog sa andang ginatutukan makaron kun paalin nga mapanumbalik ro kumpiyansa it mga ina sa health system it nasyon.
