KALIBO, Aklan—Ginkumpirma it Provincial Health Office ukon PHO-Aklan nga record-breaking ro numero it mga nagpositibo sa Coronavirus Disease 2019 ukon COVID-19 ko Biyernes nga adlaw, Pebrero 19 sa probinsiya it Aklan.
Suno kay Dr. Cornelio Cuatchon Jr., it PHO-aklan nga base sa listahan it andang Aklan Provincial Epidemiology Surveillance Unit, naga-abot sa 39 ro bag-ong kaso rason nga nag-abot eon sa 777 ro kabilugan nga numero it covid 19 sa probinsiya.
Raya sigon ro kauna-unahan nga pinakamataas nga nai-report nga number of cases sa sueod eamang it sang adlaw umpisa sa pagtama it pandemya.
28 nga kaso ro naghalin sa banwa it Kalibo, pito ro halin sa Libacao , tig daywa halin sa Makato ag Numancia.
Makabig nga high risk contact it mga nag positibo sa deadly virus ro 38 ag sambilog ro may unknown exposure nga sangka 57 anyos nga eaeaki halin sa Makato.
Naga-abot man suno kana sa lima ro dugang nga recoveries ukon kabilugan nga 613 nga pasyente ro nagmayad eon sa sakit.
May sambilog nga nadugang sa coronavirus-related deaths ukon kabilugan nga 26 eon ro namatay.
Ro datos hay base sa tests nga ginpatigayon it molecular laboratory it Aklan Provincial Hospital.