Kalibo Aklan —- Ginlaygayan it Provincial Health Office (PHO)-Aklan ro mga indibidwal nga naghalin sa Metro Manila nga nag-eagas it byahe nga makauli antes nga ginpatuman ro lock down sa nasambitang lugar nga magpaidaeom sa home quarantine sa sueod it 14 diyas.
Sa sangka press conference, ginpahayag ni Dr. Cornelio Cuatchon it PHO-Aklan nga magreport sa andang barangay agud nga matun-an it nagakaigong nga himuon partikular sa pagpaidaeom sa self ag home quarantine.
Pinaagi sigon kara hay mamonitor it Barangay Health Emergency Response Team ukon BHERT ro nasambitang indibidwal para madali ro pagtrace kon ro nasambitang indibidwal hay makaangkon it sintomas it 2019 coronavirus disease ukon COVID-19.anda sigon ro makabig nga mga persons under monitoring ag mismong ro miyembro it BHERT ro maid-id nga magamonitor kanda.
Kon makaangkon it sintomas ag ma-admit sa provincial hospital hay makabig eon sanda nga persons under investigation nga pagaboe-an it blood ag specimen sample agud nga mapaeksamin sa Researh Institute for Tropical Medicine ukon RITM.
Samtang sa pihak nga parte, magapangatubang sa nagakaigong kaso ag penalidad ro madakpan nga maga-eabag sa nasambitang sueondanan eabi eon kon sanda ro tunaan it pagkalhit it virus.
Uman kara nga ginpasiguro nga eowas sa COVID-19 ro bilog nga probinsya it Aklan matapos nga nagnegatibo ro confirmatory result it 9 nga PUI’s samtang ginahueat pa nanda sa makaron ro confirmatory result it nabilin nga sangka PUI sa provincial hospital.
Nasayuran nga sa makaron hay nagaabot eon sa 140 ro mga kumpirmadong nagpositibo sa COVID-19 sa bilog nga nasyon.
Sa nasambitang numero, 11 eon kara ro nailista nga namatay.
