Kalibo Aklan——-Sa pihak it ginapangatubang makarun nga krisis bangud sa coronavirus infectious disease (COVID-19) pandemic, nagpanawagan ro Provincial Health Office (PHO-Aklan) sa mga pomoeuyo nga maghaeong man sa posibleng pagkaangkon it mosquito dengue disease.
Suno kay Roger Deboque, Provincial Dengue Coordinator it PHO-Aklan nga makarun nga buean it Hunyo hay gina-ekspektar nga mag-ilinabo ro namok sa palibot bangud sa sigidas nga pag-inuean.
May kaangtanan kara, hugot nandang gina-kompanya ro 4-S strategy.
Raya hay ro “Search and destroy” , “Self-protection measures” , “Seek early consultation”, ag “Support fogging/spraying” .
Boot hambaeun sigon kara nga dapat limpyuhan ro palibot it panimaeay ag gilayon nga ipilak ro mga bagay nga posibleng pangitlogan it namok.
Proteksyunan ro kaugalingon pamaagi sa pagsuksok it mahaba nga saewae ag long sleeves.
I-konsidera ro pagbanyos it lotion para may pangotra sa namok nga nagadaea it virus.
Ginpahayag dugang nga malisod makarun para kanda nga matumod ro ginapakita nga sintomas it sangka pasyente nga may dengue kasunod it nagakalhit man nga COVID-19 kung sa siin parehas nga eagnat ro basehan it sakit.
Bangud kara, anang gin-engganyo ro tanan nga kung maka-eksperyensiya it eagnat hay magpakonsulta eagi sa doktor.
