KALIBO, Aklan—Kapin sa 37 ro nailistang kaso it dengue sa bilog nga probinsya it Aklan.
Raya hay base man sa nagapadayon nga monitoring it Aklan Provincial Health Office halin ko Enero 1 hasta it Mayo 7 it presenteng dag-on.
Suno kay Roger Deboque it PHO-Aklan, ro nasambit nga kaso hay bukon pa it alarming bangud nga uwa pa it ginakabig nga clustering of cases.
Apang, kon ikumpara ro nasambit nga numero ko nagataliwan nga dag-on sa kaparehong period hay nagtaas raya it kapin sa 29 porsyento.
May ginatawag nga trend ro ahensya kon siin sandig sa andang datos hay kada tatlong dag-on nakakaangkon it outbreak kon siin ulihing nakaangkon it outbreak it nasambit nga sakit ko nagtaliwan pang tatlong dag-on.
May kaangtanan kara, ginpahayag ni Deboque nga kinahang-ean gid nga maging vigilante ro mga pumueoyo partikular makaron nga tyempo it tig-ueueuan.
Apang, ro sakit nga dengue hay uwa eon it ginapili nga tyempo rason nga ginaengganyo ro tanan nga magpanglimpyo sa palibot.
I-obserba ro 4’s ukon usuyon ro mga pwedeng pangitlugan it mga eamok ag pakoebon, makaangkon it proteksyon sa eawas kaparehas sa pagsuksok it eambong nga may butkon, magpakonsulta insigida kon may ginabatyag nga eagnat ag pwedeng mag request it fogging kon may una eon nga outbreak it nasambit nga sakit.
