KALIBO, Aklan—Sa sueod it daywang adlaw nga uwa nakapaguwa it daily report ro Aklan Provincial Epidemiology Surveillance Unit it Provincial Health Office, humampak sa kabilugang 1,885 ro kabilugang kaso it coronavirus disease o Covid-19 sa bilog nga probinsya it Aklan.
Bangud kara, nagaabot sa 281 ro aktibong kaso it deadly virus nga ginakaeakipan it 216 nga una sa facility quarantine, 47 nga naka-home quarantine ag 18 ro admitted.
Suno kay Provincial Health Officer 1 Dr. Cornelio Cuatchon Jr. it PHO Aklan, sambilog sa mga ginatan-aw nga rason it pagsirit it kaso it makataeapon nga sakit sa Aklan hay ro pagpatigayon it mga family ag social gatherings kaparehas it birthday ag fiesta.
Uwa sigon nataeopangdan it iba nga may mga sintomas it deadly virus ro andang mga nakahalubilo.
Sa pihak kara, nagaabot man sa 1,562 ro total recoveries it sakit bangud sa 18 ka mga panibag-ong indibidwal nga nagmayad halin sa pagtama it deadly virus.
Kaangot kara, nag-apela ro health authority nga sundon ro ginapatuman nga 3 C’s nga ginakaeakipan it likawan ro mga crowed places; close contact setting ag ro close space partikular ro mga bukon it manami ro ventillation.
