KALIBO, Aklan—Padayun nga nagapanawagan ro Provincial Health Office (PHO)-Aklan sa mga ginikanan nga pabakunahan ro andang mga unga nga may edad lima hasta 11-anyos.
Suno kay J-Lorenz Dionesio, vaccination manager, nagaeaum sanda nga maabot ro andang target nga 500 nga mga kwalipikadong unga nga mabakunahan.
Kadungan kara, anang ginpasiguro nga eowas ag epektibo ro bakunang Pfizer nga pagagamiton sa mga unga.
Nasayuran nga pagkatapos nga ginpatigayon ro launching it resbakuna kids sa isla it boracay ko nagtaliwan nga domingo, gin-umpisahan ro pagbakuna sa mainland aklan makaron nga adlaw partikular sa NVC gymnasium.
Bukas ro bakunahan sa tanan nga mga naka-online register kun sa siin gintaw-an it prayoridad ro may comorbidity.
Agud nga mas pang ma engganyo ro mga unga, nagpahaum man sigon sanda it balloon ag gin-obra nga child friendly ro vaccination area.
Gindugang pa nga makabulig ro pediatric vaccination para sa uman nga pagpatigayon it in-person classes ag agud nga pabaskugon ro ekonomiya.
Sa mga gustong pabakunahan ro andang unga sa nasambit nga age group, magbisita sa Facebook page it Provincial Health Office Aklan ag usuyon ro registration link nga tinyURL.com/aklanresbakunakids ag maghueat it text message.
