KALIBO, Aklan—Uman nga nagpadumdom ro Provincial Health Office ukon PHO-Aklan sa publiko nga maghaeong sa paggamit it mga paeupok sa pagsug-aeaw it bag-ong dag-on mas kapin pa ag may naga-eksister sa gihapon nga layi angot kara.
Raya hay bangud nakaugalingan eun it mga Pinoy sa kada pagselebrar it Bag-ong dag-on nga magpaeupok sa pagpati nga mapaeayas kara ro mga malas nga daea it nagtaliwan nga dag-on.
Apang suno kay Ruene Perucho, Violence and Injury Prevention Program ag Health Emergency management Coordinator it PHO Aklan mas importante sa gihapon nga unahon ro kaeuwasan it tanan.
Nasayuran nga mag-euwas sa paeupok, nauna eun nga nagpahayag ro Department of Health (DOH) sa pagbawae sa publiko sa paggamit it torotot ukon pito sa Bag-ong dag-on.
Raya hay bangud madali sigon nga magtaeapnan it Coronavirus Disease 2019 ukon COVID-19 kung nagagaamit it ginahuyop nga bagay.
Gina-engganyo man it DOH ro publiko nga ma-usoy it mga alternatibo sa paeupok ag iba pang pweding gamiton pampasangag.
Pila eamang sa pwedeng gamiton nga alternatibong pampasangag hay ro tamboe, busina ukon pagpalakpak.
Nauna kara, nagpaandam ro mga eksperto sa posibleng pagsaka it numero it mga kaso it COVID-19 kasunod it holidays kung indi magsunod sa mga health protocols ro mga tawo, kapareho it hugot nga ginabawaean nga mass gathering ag reunion.
